नेपाल पर्वतारोहण सङ्घ (NMA) को आसन्न निर्वाचनलाई लक्षित गर्दै कुल बहादुर गुरुङले सङ्घको अध्यक्ष पदमा औपचारिक दाबी प्रस्तुत गरेका छन् ।

लामो समयदेखि पर्वतीय पर्यटन तथा पर्वतारोहण क्षेत्रको प्रवर्द्धनमा क्रियाशील गुरुङले पर्यटन क्षेत्रको समग्र सुधार र अन्तर्राष्ट्रिय पहिचान स्थापना गर्ने प्रतिबद्धता व्यक्त गरेका छन् ।

एनएमएमा एक कार्यकाल महासचिव पद समेत खाइसकेका गुरुङले दाबी पेश गर्दै भने, “नेपालको पर्वतीय पर्यटनको दिगो विकास, श्रमिक तथा व्यवसायीको हकहितको संरक्षण र संस्थागत सुधारका लागि मेरो उम्मेदवारी हो । म अनुभव, कार्यदक्षता र साझा नेतृत्वमार्फत NMA लाई अझ प्रभावशाली र उत्तरदायी बनाउनेछु ।”

गुरुङ पर्यटन क्षेत्रमा तीन दशकभन्दा बढी समयदेखि सक्रिय छन् । उनले देश तथा विदेशमा नेपालका हिमाली सम्भावनाहरूलाई चिनाउने अभियान, पर्वतारोहणको सुरक्षित व्यवस्थापन तथा सम्बन्धित समुदायको सशक्तीकरणमा महत्त्वपूर्ण योगदान पुर्‍याएका छन् ।

उनको उम्मेदवारीले पर्यटन व्यवसायी, गाइड, आरोही सहयोगी (Sherpa), र अन्य सरोकारवाला पक्षहरूबाट सकारात्मक प्रतिक्रिया पाएको छ । धेरैले उनी नेतृत्वमा आएमा सङ्घले पारदर्शिता, नवीन रणनीति र सहकार्यको नयाँ युगमा प्रवेश गर्ने विश्वास व्यक्त गरेका छन् ।

सङ्घको निर्वाचन यही भाद्र ८ गते सम्पन्न हुने कार्यक्रम रहेको छ । उम्मेदवारबीचको प्रतिस्पर्धा चर्किँदै जाँदा, कुल बहादुर गुरुङको दाबीले निर्वाचनको केन्द्रमा व्यापक चासो र छलफल सिर्जना गरेको छ ।