बेनीघाट रोराङ गाउँपालिकाको सातौँ राष्ट्रपति रनिङशिल्ड प्रतियोगिता आज  पूर्व राष्ट्रपति विद्या भण्डारीद्वारा भव्य रूपमा उद्घाटन गरिएको छ।

गाउँपालिकाको वडा नम्बर ५, विशालटारस्थित श्री चन्द्रोदय माध्यमिक विद्यालयको प्राङ्गणमा आयोजित उद्घाटन समारोहमा पूर्व राष्ट्रपति विद्यादेवी भण्डारीको प्रमुख आतिथ्य तथा बागमती प्रदेशका पूर्व मुख्यमन्त्री शालिकराम जमरकट्टेलको विशेष आतिथ्य रहेको थियो।

विद्यालय स्तरका विद्यार्थीहरूको खेलकुद प्रतिभा पहिचान, विकास र प्रोत्साहन गर्ने उद्देश्यले सञ्चालन हुँदै आएको राष्ट्रपति रनिङशिल्ड प्रतियोगिता नेपाल सरकारको एक महत्त्वपूर्ण राष्ट्रिय खेलकुद कार्यक्रम हो। यस प्रतियोगितामार्फत ग्रामीण तथा दुर्गम क्षेत्रका विद्यार्थीहरूलाई पनि प्रतिस्पर्धात्मक खेलकुदमा सहभागी गराई राष्ट्रिय तथा अन्तर्राष्ट्रिय खेलाडी उत्पादन गर्ने लक्ष्य लिइएको छ। प्रतियोगितामा एथलेटिक्स, भलिबल, फुटबल, कबड्डी लगायतका विभिन्न खेल विधामा प्रतिस्पर्धा हुने गर्दछ भने उत्कृष्ट प्रदर्शन गर्ने विद्यालयले सर्वाधिक पदकका आधारमा ‘रनिङशिल्ड’ उपाधि हात पार्ने व्यवस्था रहेको छ।

बेनीघाट रोराङ गाउँपालिका स्तरमा आयोजना गरिएको यस सातौँ संस्करणको प्रतियोगितामा पालिकाभित्र रहेका १२ वटै माध्यमिक विद्यालयहरूको सहभागिता रहेको छ। विभिन्न खेल विधामा विद्यार्थी खेलाडीहरूले प्रतिस्पर्धा गर्ने यस प्रतियोगितालाई स्थानीय स्तरमा खेलकुद विकासको महत्त्वपूर्ण आधारका रूपमा लिइएको छ।

उद्घाटन समारोहलाई सम्बोधन गर्दै पूर्व राष्ट्रपति विद्यादेवी भण्डारीले नेपालको दिगो विकास र समृद्धिका लागि आर्थिक विकासलाई प्रमुख प्राथमिकता दिनुपर्नेमा जोड दिइन्। उनले स्थानीय तहमा देखिएको विकास गतिविधि र जनसहभागिताको प्रशंसा गर्दै बेनीघाट रोराङ गाउँपालिकामा भइरहेको समृद्धिको यात्राले आफूलाई निकै खुसी बनाएको बताइन्। 

दुई कार्यकाल नेपालको राष्ट्रपति भई नेतृत्व गरेकी भण्डारीले भनिन्, “खेलकुदले युवामा अनुशासन, आत्मविश्वास र नेतृत्व क्षमता विकास गर्छ, जसले समग्र समाज निर्माणमा योगदान पुर्‍याउँछ।"

त्यसै गरी विशेष अतिथि बागमती प्रदेशका पूर्व मुख्यमन्त्री शालिकराम जमरकट्टेलले खेलकुदले देशलाई राष्ट्रिय तथा अन्तर्राष्ट्रिय रूपमा चिनाउन महत्त्वपूर्ण भूमिका खेल्ने भएकाले यस क्षेत्रलाई राज्यको प्राथमिकतामा राख्नुपर्ने बताए। उनले आफू मुख्यमन्त्री बनेको समयमा खेलकुद क्षेत्रलाई विशेष महत्त्व दिँदै प्रत्येक जिल्लामा खेलकुद विकास कार्यालय स्थापना गर्न बजेट विनियोजन गरिएको स्मरण गराए। “खेलकुदमा गरिएको लगानी भविष्यका लागि दीर्घकालीन सम्पत्ति हो,” जमरकट्टेलले भने।

कार्यक्रममा गाउँपालिका अध्यक्ष, जनप्रतिनिधि, शिक्षा क्षेत्रका सरोकारवाला, शिक्षक, विद्यार्थी तथा स्थानीय बासिन्दाको उल्लेख्य उपस्थिति रहेको थियो। आयोजकका अनुसार राष्ट्रपति रनिङशिल्ड प्रतियोगिताले विद्यार्थीहरूमा खेलकुदप्रतिको रुचि बढाउनुका साथै स्वस्थ जीवनशैली, आपसी सद्भाव, अनुशासन र प्रतिस्पर्धात्मक भावना विकास गर्न महत्त्वपूर्ण भूमिका खेल्दै आएको छ।

स्थानीय तहमा नियमित रूपमा आयोजना हुँदै आएको यस प्रतियोगिताबाट प्रतिभावान् खेलाडीहरू प्रदेश तथा राष्ट्रिय स्तरसम्म पुग्ने अपेक्षा गरिएको छ। बेनीघाट रोराङ गाउँपालिकाले आगामी दिनमा खेलकुद पूर्वाधार विस्तार र प्रतिभा संरक्षणमा थप जोड दिने जनाएको छ।

गाउँपालिकाका अध्यक्ष कृष्ण बहादुर थपलिया (विवेक) को अध्यक्षतामा आयाेजित उद्घाटन समारोहमा उपस्थित अतिथिगणलाई पालिकाका उपाध्यक्ष टाप बहादुर श्रेष्ठले स्वागत गरेका थिए । कार्यक्रममा उद्घोषणको भूमिका गाउँपालिकाका शिक्षा अधिकृत बोधराज पाठकले निभाएका थिए । प्रतियोगिता एक हप्तासम्म निरन्तर चल्ने छ । 

तस्बिरहरूः
 

तस्बिरः चन्द्र तामाङ