“एक पाना पढ्नु भनेको एउटा नयाँ जीवन जिउनु हो” भन्ने मूल नाराका साथ कवि महान त्यागीले बेनीघाट रोराङ्ग गाउँपालिकामा पठन पुनर्जागरण अभियान सुरु गरेका छन् ।

पुस्तकालय दिवसको अवसर पारेर सुरु गरिएको साताव्यापी अभियान अन्तर्गत गाउँपालिकाभित्रका १२ वटै माध्यमिक विद्यालयमा पुगेर उनले विद्यार्थी, शिक्षक र अभिभावकलाई पठन संस्कृतिको महत्त्वबारे सचेत गराएका छन् ।

अभियानका क्रममा उनले करिब दस हजार रुपैयाँ बराबरका ७२ थान पुस्तक वितरण गर्दै विद्यालयस्तरमै पुस्तकालयलाई मजबुत बनाउन योगदान गरेका छन् । कार्यक्रममा विद्यालय प्राचार्यहरूले यसलाई दीर्घकालीन दृष्टिले विद्यालयमा पढ्ने संस्कृतिलाई सबल बनाउने प्रयास भएको भन्दै सह्राना गरेका छन् ।

कविले आफ्नो अनुभव सुनाउँदै भने, “पठन संस्कृतिको अभावले हाम्रो समाज कमजोर हुँदै गएको छ। पुनर्जागरणको बिउ रोप्दै हिँडेको छु, आशा छ निकट भविष्यमा यो ठूलो वृक्ष बन्नेछ ।”

यसअघि पनि उनले गजल गङ्गा मासिक पत्रिका, मालश्री भित्ते फ्लेक्स पत्रिका प्रकाशन गर्दै कविता अभियानमार्फत गाउँका भित्तामा कविता लेख्ने कार्य गरेका थिए । अहिले सुरु गरिएको अभियानले विद्यार्थीहरूमा पठनप्रतिको आकर्षण बढाउने र दीर्घकालीन रूपमा शैक्षिक गुणस्तरमा सुधार ल्याउने अपेक्षा गरिएको छ ।