धादिङको गजुरी गाउँपालिका–४ अन्तर्गत थाङ्सिङखर्क र गोङ्वी गाउँको बीचमा रहेको बाङराङ खोलामा १० करोड रुपैयाँ लागतमा पक्की पुल निर्माण हुने भएको छ ।  

सङ्घीय सरकारले नयाँ आर्थिक वर्ष २०८३/८४ को वार्षिक नीति तथा कार्यक्रम मार्फत बाङराङ खोलामा पक्की पुल निर्माण गर्नका लागि १० करोड रुपैयाँ बजेट विनियोजन गरेको छ । 

पक्की पुल बन्ने सुनिश्चित भएपछि स्थानीय बासिन्दामा खुसी छाएको छ । गजुरी गाउँपालिकाको विकट क्षेत्रमा पर्ने वडा नम्बर ४ का स्थानीयले वर्षौँदेखि भोग्दै आएको समस्या अब समाधान हुने भएको छ ।

बाङराङ खोलाले लामो समयदेखि स्थानीयको दैनिक जीवनमा चुनौती थप्दै आएको थियो । विशेषगरी वर्षा याममा खोलामा आउने बाढीका कारण विद्यार्थी, किसान, बिरामी तथा सर्वसाधारणलाई आवतजावत गर्न निकै कठिनाइ हुने गरेको थियो।

गजुरी–४ स्थित श्री पिण्डेश्वरी माध्यमिक विद्यालयमा अध्ययन गर्ने भुमेढुङ्गा, दरिङ्गाल, चिउरिखर्क, अर्खौले र थाङ्सिङखर्क क्षेत्रका विद्यार्थीहरू हरेक दिन यही खोला पार गरेर विद्यालय आवतजावत गर्नुपर्छ । वर्षाको समयमा खोला बढ्दा विद्यार्थीहरू जोखिम मोलेर यात्रा गर्नुपर्ने अवस्था थियो भने कतिपय समयमा पढाइसमेत प्रभावित हुने गरेको थियो ।

पुल निर्माण सम्पन्न भएपछि विद्यार्थीहरूको विद्यालय आवतजावत सुरक्षित हुनुका साथै स्थानीय बासिन्दाको दैनिक जीवन सहज हुने अपेक्षा गरिएको छ । यसले गजुरी–४ का बस्तीहरूलाई थप सहज रूपमा जोड्ने र स्थानीय आर्थिक तथा सामाजिक गतिविधिमा समेत सकारात्मक प्रभाव पार्ने विश्वास गरिएको छ।

पुल निर्माणको लागि बजेट विनियोजन गरेपछि वडाध्यक्ष सुरेन्द्र चेपाङले सङ्घीय सरकारलाई धन्यवाद व्यक्त गरेका छन् । संघीय सांसद उर्मिला थपलिया (सिता) काे सिफारिसमा सरकारले पुल निर्माणकाे लागि बजेट विनियाेजन गरेकाे वडाध्यक्ष प्रजाले जानकारी दिए । 

लामो समयदेखि पुल निर्माणको माग गर्दै आएका स्थानीयवासीहरूले सरकारको निर्णयको स्वागत गरेका छन् । उनीहरूका अनुसार पुल बनेपछि वर्षौँदेखि भोग्दै आएको जोखिम, डर र सास्तीको अन्त्य हुने मात्र होइन, विकट मानिएको यस क्षेत्रको विकासमा समेत महत्त्वपूर्ण योगदान पुग्नेछ ।